Dmirijiet

Id-dmirijiet tas-SEBĊ u ta’ l-Eurosistema huma stabbiliti fit-Trattat li jistabbilixxi l-Komunità Ewropea. Dawn huma speċifikati fl-Istatut tas-Sistema Ewropea tal-Banek Ċentrali (SEBĊ) u tal-Bank Ċentrali Ewropew (BĊE). L-Istatut huwa protokoll anness mat-Trattat.

It-test tat-Trattat jirreferi għas-‘SEBĊ’ iżjed milli għall-‘Eurosistema’. Dan ġie abbozzat fuq il-premessa illi l-Istati Membri kollha ta’ l-UE se jadottaw l-euro. Sakemm dan iseħħ, tkun l-Eurosistema li twettaq id-dmirijiet.

Għanijiet

“L-għan ewlieni tas-SEBĊ huwa li żżomm l-istabbiltà fil-prezzijiet”.

U: “mingħajr preġudizzju għall-għan ta’ l-istabbiltà tal-prezzijiet, is-SEBĊ għandha tappoġġja l-linji politiċi ekonomiċi ġenerali fil-Komunità bil-għan illi tikkontribwixxi għal kisba ta’ l-għanijiet tal-Komunità kif stabbilit fl-Artikolu 2.” (Trattat (Artikolu 105 (1))

L-għanijiet ta’ l-Unjoni (Artikolu 2 tat-Trattat dwar l-Unjoni Ewropea) huma livell għoli ta’ impjieg u ta’ żvilupp sostenibbli u mhux inflazzjonarju.

lura għall-bidu tal-paġna

Dmirijiet bażiċi

Skond it-Trattat li jistabbilixxi l-Komunità Ewropea (Artikolu 105.2), id-dmirijiet bażiċi huma

• id-definizzjoni u l-implimentazzjoni ta’ politika monetarja għaż-żona ta’ l-euro;
• il-ġestjoni ta’ l-operazzjonijiet tal-kambju ta’ flus barranin;
• iż-żamma u l-amministrazzjoni tar-riservi barranin tal-pajjiżi taż-żona ta’ l-euro (ara l-amministrazzjoni tal-portafolli);
• il-promozzjoni għat-tħaddim bla xkiel tas-sistemi ta’ pagamenti.

lura għall-bidu tal-paġna

Dmirijiet oħra

• Flus tal-karti: il-BĊE għandu d-dritt esklussiv illi jawtorizza l-ħruġ tal-flus tal-karti ġewwa ż-żona ta’ l-euro.
• Statistiċi: f’kooperazzjoni mal-BĊN, il-BĊE jiġbor l-informazzjoni statistika meħtieġa għat-twettiq tad-dmirijiet, jew mill-awtoritajiet lokali jew direttament mill-operaturi ekonomiċi.
• Stabbiltà u sorveljanza finanzjarja: is-sistema Ewropea tikkontribwixxi għat-tmexxija bla xkiel tal-linji politiċi segwiti mill-awtoritajiet responsabbli, li għandhom x’jaqsmu mas-sorveljanza prudenti ta’ l-istituzzjonijiet ta’ kreditu u ma’ l-istabbiltà tas-sistema finanzjarja.
• Kooperazzjoni Internazzjonali u Ewropea: il-BĊE jżomm relazzjonijiet ta’ xogħol ma’ istituzzjonijiet, korpi u fora relevanti kemm fi ħdan l-UE kif ukoll fuq livell internazzjonali F’dak li jirrigwarda d-dmirijiet fdati f’idejn l-Eurosistema.

lura għall-bidu tal-paġna